පළා බබා

උතුරේ දෙමළ පක්ෂ ෆෙඩරල් ක්‍රමයක් ඉල්ලා සිටියා. එහෙත් LTTE නායකයා – ප්‍රභාකරන් කෙළින්ම ඉල්ලා සිටියේ වෙනම රාජ්‍යයක්.
JR ජයවර්ධන ඉන්දියාව සතුටු කිරීමට පළාත් සභා අච්චාරුව ඇති කළේය. රට පුරාම උද්ඝෝෂණ පටන් ගැනින. පාසැල් වල පවා.
පාසැල් වලින් එළියට ආ සිසු සිසුවියන් “පළාත් සභා- අපට එපා” කියල කෑ ගැසුවා. මෙලෝ හසරක් නොදන්නා පොඩි පංති වල උනුත් කෑ ගැහුවා තමන්ගේ කන් වලට ඇහුනු විදියට.
” පළා බබා- අපට එපා”

අද කතාව අපේ පළාතේ පළා බබෙක් ගැනයි.

රත්නපාල වෙද මහත්තයා සර්වාංග වෙදෙක්. වෙදකම ගැන උගත්තෙක්වත් – පරම්පරාවෙන් පැවැතෙන වෙදෙක් වත් නොවේ. ගමේ උන් නම් කියන්නේ ප්‍රසිද්ධ වෙද මහතෙක් ළඟ සෑහෙන කාලයක් අත් උදව්වට හිටි කෙනෙක් කියලා. කෙසේ වෙතත් සිංහළ වෙදකම වැරදිලා ලේසියෙන් ලෙඩෙක් මැරෙන්නේ නැහැනේ.. ඒ නිසා ඔය ඉඳල හිටලා රත්නපාල වෙද මහත්තයා හොයා ගෙනත් කෙනෙක් දෙන්නෙක් ආවා. ලෙඩ බැලුවෙත් , බෙහෙත් කිරල මැනල දුන්නෙත් වෙද මහත්තයාමයි. බෙහෙත් නිකුත් කරන කවුන්ටරය උඩ යකඩ කූරක ඇමිනූ නොම්මර විස්සක් තිහක් විතර තිබුණා.
එක්කෙනෙක් ආවත් නොම්මරයක් නම් ගත යුතුමයි.
ලෙඩුන්ට වඩා වැඩි පුර ආවේ ආණ්ඩුවේ රස්සාවල් කරන මහත්තුරු නෝනලා හොර වෛද්‍ය සහතික අරන් යන්ට. සහ බැංකුවල වැඩ කරන මහත්තුරුන් සහ නෝනලා හොර කුවිතාන්සි අරන් යන්ට.
රත්නපාල වෙද මහත්තයගෙ පවුල – ඒ කියන්නෙ භාර්යාව ගුරුතුමියක්. ඈ පහල පංති වලට සෞඛ්‍යය, සමාජ අධ්‍යනය වගේ විෂයයන් ඉගැන්නුවා.

එයාලගේ අසල්වැසියා රත්නම් මහත්තයා යාපනේ දෙමළ ජාතිකයෙක්. බිරිඳ මිය ගිහින්. පාර්ලිමෙන්තුවේ ලිපිකරුවෙක් විදියට වැඩකරල දැන් විශ්‍රාම සුවයෙන් ඉන්නා කෙනෙක්.

රත්නම් මහත්තයා දවසක් හැන්දෑවක ආවා වෙදමහත්තය බලන්න. අරිෂ්ට ඩිංගිත්තක් ඉල්ල ගන්න. නියම බඩු. වැදගත් විදියට- කාටවත් නොදැනෙන්ට වීදුරු භාගයක් විතර බීල සුව නින්දක් ගහන්න පුළුවන්.

“දැක්කද නිවුස් ?”
” දැක්ක. දැක්ක.. කොහොමද අපේ එකා රජීව් ගාන්ධිට දෑත බදල දුන්නු හැටි.”
” චිඃ.. ජරා වැඩ. අන්සිවිලයිස්ඩ්.. හොඳ වෙලාවට ප්‍රෙසිඩන්ට් වැඩේ ෂේප් කර ගත්තා. නැත්තං උන් එහේ ඉඳන් මෙහාට ගහයි. අපි මොනව කරන්නද ? ආපහු ගහන්නද ? මොකෙන් ගහන්නද ?”
” නෑ මං කිව්වෙ මම ඔතන හිටියත් කරන්නෙ ඕක. උන්ට වැඩක්යැ වෙනත් ස්වාධීන රටකට අත පොවන්න.”

” එක නෙවි මං ආවෙ .. පළාත් සභා ඇති කරන්න යනවළු. හැම පළාතකටම ආණ්ඩුවක්. ”
“එතකොට මේ දැන් තියෙන ආණ්ඩුව?”
” ඒකත් එහෙම්ම තියෙනවා. දෙමළ මිනිහට, මුස්ලිම් මිනිහට සම සමව බලය බෙදා දෙන ක්‍රමයක්. ඕක මීට අවුරුදු ගාණකට ඉස්සර කරන්න තිබුණු දෙයක්”
” වෙද මහත්තය ඉල්ලන්න මේ පළාතෙන්.. UNP එකෙන්. බය වෙන්න එපා. අපි සපෝට් එක දෙන්නම්. පොල් පිත්තකින් puppet කෙනෙක් හදල තිබ්බත් දිනනවා. මිනිස්සුන්ට මේක අළුත් දෙයක්.
” මගෙ බල්ලටවත් එපා. මිනිස්සුන්ගෙන් බැණුම් අහන්න”
” ටිකක් හිතල බලන්න. ඉස්කෝළෙ හාමිනේ ගෙනුත් අහල..”
රත්නම් මහත්තයා ඇවිත් විෂබීජ වැපිරුවා. රත්නපාල වෙද මහත්තයට එදා නින්ද ගියේම නෑ.
හොඳ පඩියකුත් ලැබෙයිනේ. වාහනයක්. ආරක්ෂක පිරිවර.. උත්සව.. විවෘත කිරීම්. මළ ගෙවල්. මගුල් ගෙවල්. කොටහළු ගෙවල්. ගරු සැළකිලි..හප්පා..සුදු ජාතික ඇඳුම ඇඳල. මේ ඇඟිලි වැහෙන්න සපත්තු දාල.. ඕන වුනොත් පස්සෙ කළිසමට උනත් හුරු වෙන්න පුළුවන්.
පළාත් සභා මන්ත්‍රී.. ඇමති.. මහ ඇමති.. ඊ ළඟට රිංගනවා පාර්ලිමෙන්තුවට.. උප ඇමති.. ඇමති.. අගමැති.. ජනාධිපති වෙන්නත් පුළුවන්..
රත්නම් කාරය ඇවිල්ල මාර ලෙඩක් නේද දැම්මේ ?

” රත්නම් මහත්තයා.. ඔන්න මං අපේ පවුලගෙනුත් ඇහුවා. එයා නං උඩින්ම කැමතියි”

ඔය හොර මෙඩිකල් වලින් කීයක් හම්බ කරන්නද ? කෙල්ල කාට හරි දෙන්න ඕන. පුතාට මාසයකට සැරයක් සල්ලි යවන්න ඕන. ඔය මහපොලින් ලැබෙන ගාන මදිලු.

” වෙද මහත්තයා.. ඔය සේරම ප්‍රශ්නවලට තියෙන එකම විසඳුම… ඔන්න මාව අමතක කරන්න එපා..”
” සේරමත් හරි මට ඔය වේදිකාවල කැ ගහල පුරුදු නෑනෙ. ඉඳල හිටල සොහොන් පොළවල් වල නං කතා පවත්තල තියෙනව.
” අඩ්.. ඩඩ්.. ඩා.. මට ෂිංහල ලියන්න බෑනේ. නැත්නම් මට ලියල දෙන්න තිබුණා. කොහොමටත් ඕව මෙහෙමයි..
ගරුතර මහා සංඝරත්නයෙන් අවසරයි.. අන්‍යාගමික පූජකයන්ගෙන්, පළාතේ මන්ත්‍රී තුමාගෙන් , දිසාපති තුමාගෙන්, පොළිස් නිලධාරි තුමන් ගෙන් , මව්වරුන්ගෙන් පියවරුන්ගෙන් ,සහෝද්ද, සහෝද්ද වරුන් ගෙන අවසර ගන්න කොට නිකම්ම විනාඩි පහක් ගිහින්.
ඊට පස්සෙ ටිකක් ඇදල පැදල ඔය ගම් පළාතේ කාණුවක්, බෝක්කුවක් ගැන, ගම්සභා පාරක අළුත්වැඩියාවක් ගැන කියල , කලින් ආණ්ඩුව ඒව ඉෂ්ට නොකළ එක ගැන ටිකක් සද්දෙන් කතා කරපුවම අපෙ උන් අප්පුඩි ගහයි කන් පැලෙන්න.”
” මාස දෙක තුනක් යන කොට නිකම්ම හුරු වෙයි.. peace of cake.
රත්නම් මහත්තය සහෝදරයෝ ගැන කියන කොටයි මට මතක් උනේ.. වේදිකාවෙ වගේ නෙවේ ඔය සභා වාරයකදි අරුන්ට එහෙම අහු උනොත් විනාසයි. උන්ට මාර දැනුමක් තියෙන්නේ.”
” ඒවට මුලින්ම කට දාන්න ඕන නෑ. දැන් ඔය පාර්ලිමෙන්තුවෙ කී දෙනෙක් නං කියල ඉන්නවද ඈණුමක් අරින්නවත් කට අරින්නෙ නැති මන්ත්‍රීලා”

රත්නපාල මහත්තයට නොමිනේෂන් ලැබුණා. එදා රෑ මාර ජය පාටියක් ගෙදර.
පළාතේ ගරු මන්ත්‍රී හමීඩ් මහත්තයගෙ පැජරෝ එක පිරිවරා ගෙන වාහන පෝලිමයි.
” තාත්තෙ මේ ආපු ටික චන්දෙ දුන්නත් අපිට දිනන්න පුළුවන් නේද ”
එකම දුව රත්නා අසා සිටියා.

මතු සම්බන්ධයි.