අපිදු කතිර ( හිල් ) ගැසුවෙමු.

වසර 4 කට වරක් අනිවාර්යයෙන්ම පැවැත්වෙන , ලොව ප්‍රබලම , විශාල රටක ජනාධිපතිවරයා
තෝරා ගැනීමට මා ඇතුළු මගේ පවුලේ අයටද ඇරයුම් කර ඇත. එය ඉතා භාරදූර වගකීමක් බව මගේ ඇඟට දැනේ. ඒ සමඟම සියුම් අහිංසක ආඩම්බරයක්ද ඇතිවේ.

මාසයකට පමණ පෙර සාම්පල් බැලට් පත්‍රිකාවක් තැපැලෙන් ලැබුනි. ජනාධිපතිවරයාට අමතරව , සම්මත කර ගත යුතු තවත් යෝජනා කීපයකටද අප ඡන්දය පාවිච්චි කළ යුතුය.

ප්‍රධාන තරඟය ඇත්තේ ඩිමොක්‍රැටික් පක්ෂයේ ඔබාමා සහ රිපබ්ලිකන් පක්ෂයේ රොම්නි අතරය. තවත් ස්වාධීන තරඟ කරුවන් කීප දෙනෙකුන්ද වේ. මැතිවරණයට පෙර ගුවන් විදුලියේ සහ රූපවාහිනියේ දෙදෙනාගේම වාද විවාද රැසක්ම විය. දෙදෙනා එකම වේදිකාවක හිඳ ඉතා සුහදශීලිව කළ විවාදයන්ද විය.

මිලියන 240 ක පමණ ජනගහණයක් ඇති රටක , මැතිවරණ නීති කඩ කිරීම් එකක්වත් මේ වන විට වාර්තා වී නැත. පොස්ටර් ගැලවීම් , විරුද්ධ පාක්ෂිකයනට හිරිහැර කිරීම් , ගෙවල් ගිනි තැබීම් එකක්වත් නැත. කෙටියෙන්ම කියනවා නම් 6 වනදා වන තුරුම කිසිම මැතිවරණ කාළගුණයක් නොවීය.

සැක්‍රමැන්ටෝහි ජීවත්වන මගේ වැඩුමළ් දියණිය ඡන්දය සඳහා ඒ පළාතේම ලියා පදිංචි වී ඇත.
” තාත්ති.. ඔබාමට vote කරන්න” 5 දා හවස ඈ මට දුරකතනයෙන් කීවාය.

ගියවර 2008 දීද මම ඔබාමාට ඡන්දය දුන්නේ නැත. ඇමරිකාවේ මිනීමරුවන් , මංකොල්ලකරුවන් , ස්ත්‍රී දූෂකයන් , හිඟන්නන් , කුඩුකාරයන් බොහොමයක් කල්ලන්ය. ඔබාමාද කල්ලෙකි. කළුපාට කැතය. නපුරුය.

2008 ජයග්‍රහනයෙන් පසුව ඔබාමා ඇඟට වැදෙන කතාවක් කොට , රටේ ඉන්නා සියළුම දක්ෂයින් , නොබෙල් ත්‍යාගලාභීන් , විද්‍යාඥයන් , විශේෂඥයන් තම උපදේශකයන් කර ගත්තේ හරියට මහින්ද වාගේමය. ඒත් කළ දෙයක් නැත. කරන්නට දෙයක් නැත. ඒ තරමටම රට ප්‍රපාතයට වැටී ඇත. ව්‍යාපාර වැසී ගෙන යයි. බැංකු බිඳ වැටෙයි. රැකියා වියුක්තිය ඉහළ යයි. ඉරාන්කාරයාත් , උතුරු කොරියන්කාරයාත් කොකා පෙන්නද්දී නිහඬවම ඉන්නට සිදුව ඇත.

” තාත්ති…Pro: 34 ගැන මොකද හිතන්නෙ ?” එනම් මරණ දඬුවම තවදුරටත් ක්‍රියාත්මක කරනවාද , ඒ වෙනුවට ජීවිතාන්තය දක්වා සිර දඬුවම් දෙනවාද යන්නට මහජන කැමැත්ත විචාරීමය.

” මරණ දඬුවම අනිවාර්යයි.. එහෙම නැත්නම් රටේ මිනීමැරුම් වැඩි වෙයි. පේනවාද ලංකාවට වෙලා තියෙන දේ. ?”
” තාත්ති මිනී මරන්නේ මානසික අසහන කාරයෝ. උන්ට මරණ දඬුවම සිම්පල්”
” වයස අවුරුදු 20 ක කෙනෙකුට මරණ දඬුවම වෙනුවට ජීවිතාන්තය දක්වා සිර දඬුවම් දුන්නොත් මොකද වෙන්නෙ? මිනිහ අවුරුදු 40 ක් ජීවත් උනොත් , අපි අපේ ටැක්ස් සල්ලි වලින් මිනිහට අවුරුදු 40 ක්ම කන්න දෙන්න වෙනව නේද ? මරණ දඬුවම දුන්නම කීයක් ඉතුරු වෙනවද ?”

” මිනී මැරූ කෙනෙකුට දෙන දඬුවම මරණය නම් , ගෙයක් බිඳල හොරකම් කළ කෙනෙකුට දෙන දඬුවම ඒ මිනිහගේ ගේ බිඳවල බඩු හොරකම් කරවන එකද ? ස්ත්‍රී දූෂකයෙකුට දෙන දඬුවම , ඒ මිනිහගේ අම්මා , අක්කා , නංගී හෝ බිරිඳ දූෂණය කරවන එකද?”

උපාධිය සඳහා සයිකොලොජි ඉගෙන ගන්නා ඈ සමඟ මම වාදයට නොයමි.

අද 6 වන දා…මගේ බාල දුවත් කෙටි නිවාඩුවකට ගෙදර ඇවිත්. ඇයටත් මේදා පාර ඡන්දෙ තියෙනව. අපි තුන් දෙනාම ඡන්ද පොළට ගියේ හවස 7.15 ට විතර. වැඩ ඇරිල ගෙදර යන ගමන්ම. රෑ 8 වන තුරු ඡන්දෙ දාන්න පුළුවන්.

” මචං දැනටමත් ඔබාම දිනල” යාළුවෙක් මට කෝල් කළා.
ඡන්ද පොළ අවට කුළු පොලු කාරයන් නැත. තුවක්කු කාරයන් නැත. පාට කැප් තොප්පි දමා ගත් මැරයන් නැත. පොලිස්කාරයෙක් පේන තෙක් මානෙක නැත.
” ඔන්න එනව පොලිස් කාර් එකක්” එයත් අප පහු කර ගෙන ගියා. ඌත් ඩියුටි ඕෆ් වෙලා ගෙදර යන එකෙක්ද කොහෙද. ඡන්ද මධ්‍යස්තානය භාරව ස්වේච්ඡාවෙන් වැඩ කරන හැට පැනපු ගැහැණුන් හා මිනිසුන් සිනාමුසු මුහුණින් බලා හිඳී.
ඡන්ද ලැයිස්තුවේ එකම තැන අපි හතර දෙනාගේම නම් එක පොදියට අප එන තුරු බලා හිඳී. වෙනත් අය ඒවා පාවිච්චි කර නැත.
ඔබට උදව් අවශ්‍යද?” ඡන්ද පත්‍රිකාව මා අතට දී එක නිලධාරියෙක් ඇසීය. මම “නැහැ” කීවෙමි.
දැනටමත් ඔබාම දිනල නම් රොම්නිට ගහල වැඩක්යැ. නොදන්නා යකාට වඩා දන්න යකා හොඳයි. ඔන්න ඔහෙ ඔබාමටම ගහල දානව.
විනාඩි දෙකකින් ඡන්ද පත්‍රිකාව පෙට්ටියට දැමුවා. I Voted ස්ටිකරය කම්සයේ උඩින්ම අලවා ගත්තා.

කිවිසුම් යන්ට එන කලෙක මෙන් නැහැයේ දැවිල්ලක් ඇති විය.
ඇඬුම් යන්ට එන කල මෙන් ඇස් කොනට කඳුළි බිඳුවක් එකතු විය.
කුඩා විදුලි සැරයක් වැදුනු කලෙක මෙන් හිරි වැටීමක් ඇති විය.
ඒ ; ප්‍රබල රාජ්‍යයක ජනාධිපති තෝරා ගැනීමට මාත් හවුල්කාරයෙක් උනා නේදැයි යන අහිංසක ආඩම්බරය නිසාද ;

නැතහොත් ; අනේ මගේ රටෙත් මෙවන් මහත්මා මැතිවරණයක් දකින්නේ කවදාද යන දුකට ද ; සමහර විට ඒ දෙකටම විය හැක.

ඇමරිකන් ව්‍යවස්තාවට අනුව ඔබාමාට නැවත වරක් තරඟ කළ නොහැක. හිතවත් ඔබාමා….මේ අවුරුදු හතරේදීවත් මොනව හරි කර ගම්මු නේද ? අපට නැතත් කමක් නෑ… තවමත් සාමාන්‍ය ජීවිත ගත කරන ඔබේ පවුලේ අයටවත්….

මේ මියුරු ගීතය ඔබාමාට උපහාරයක් වේවා. ! 🙂