100. වැස්ස

අද වැස්ස ගැන ලියන්න හිතුවේ ;
” වර්ෂා ” මට ගිය ඉරිදා පංසලේදී හමු වූ , ඉතා මෑතකදී ඇමරිකාවට සංක්‍රමණය වූ පවුලක කුඩා හුරුබුහුටි ගැහැණු ළමයෙක්.රවුම් වටකුරු මුහුණත් , වයස වැඩි කර පෙන්වන සේ කරල් දෙකක් වන්නට ගෙතුනු දික් කොණ්ඩයත් නිසා තාමත් ඇගෙන් ශ්‍රී ලාංකීය සුවඳ වහනය උනා.
ඈ අනෙක් කුඩා ළමුන් සමඟ පංසල් භූමියේ සෙල්ලම් කලා.ඇගේ මුහුණ විඩාවෙන් රත් පැහැ ගැන්වී තිබුනා. ඇගේ අහිංසක විලාශයන් දුටු මගේ ඇසට කඳුළක් එකතු වුනා.
ඇගේ පියා මා අසළට ආවා.
” ඇයි මිස්ටර්ට බබාල නැද්ද?”
“හිටිය… උන් දැන් අලි බබාල”
වැස්ස ස්වභාව ධර්මයේ තවත් අපූරු දායාදයක්. වැස්ස සහ ගැහැණිය , ආදරය අතර ඇත්තේ සමීපතාවයක්.
” ඔබ.. මගේ හද කුටියට ආවේ අකලට වට වරුසාවක් වගේ”
නිරන්ජලා සරෝජිනී ගයයි. අහන්න
වැස්ස ඇතිවන්නේ කොහොමද ?
පොළොව මතු පිට ඇති ජලය හිරු රශ්මියෙන් වාෂ්ප බවට හැරී , ඒවා වළාකුළු බවට පත් වී පසුව යම් විටෙක ඝනීභවනය වීමෙන් වැස්ස ඇතිවේ.
” නිල් ගංගා කුමරියගේ නළල් තලය සිඹ
ඇගේ සිහිල ඇයට හොරෙන් ඔබෙ දෝතට ගෙන”
නන්දා මාලිනී ගයයි.
ගමේ ඉස්කෝලෙ බාලාංශ පන්තියේ හිටියදී පැහිච්ච කොල්ලො කීවෙ ඒ දෙවියන් චූ කරනවා කියල.. මොන බොරුද ?
” මෙන්න ප්‍රවෘත්ති… ඊයේ නුවර එළිය , වැලිමඩ පෙදෙස් වලට දැඩි වර්ෂාවක් ඇතිවිය. වැසි ජලයත් සමඟ කුඩා මත්ස්‍ය පැටවුන් හා ඉබි පැටවුන්ද වැටුනු බව ප්‍රදේශ වාසීන් පවසයි”
ජලය වාෂ්ප වන විට එක්තරා අවස්තාවකදී water spout එකක් සෑදී ජලාශ වල සිටින් කුඩා ජීවින් මෙලෙස වලාකුළු තුලට ඇදී යාමට පුළුවන්.
ඇමරිකාවේ මිචිගන් , ටෙක්සාස් ප්‍රාන්තවල නිරන්තරයෙන් ඇතිවන tornado මගින්ද මෙලෙස ජලජ ජීවින් ගුවන් ගත වීමට පුළුවන.මෙසේ සතුන් නොහොත් මෘගයින් සමඟ වැටෙන වැසි මුරුගසං වැසිය.
ඉඳහිට වහින වැසි අසනි වැසිය. පොකුරු වැසි වසින්නේ පින් වන්තයන්ටය.
එක දිගට පැල් බැඳ ගෙන වහින අනෝරා වැස්සට මා ඉතා බයය.
පොල් අතු , පිදුරු සෙවිලි කල වහල මතු පිටට වැටෙන වැස්සත් සමඟ ඒ තුල සිර වී සිටින කුඩා සතුන්ද බිමට වැටේ.
ධාරානිපාත වැස්සක් ගැන ඉංග්‍රීසියෙන් මෙසේ කියැවේ.
” It was raining cats & dogs ” ඒ ද මුරුගසං වැසිය.
වසර පන් දහසක් යනු කල්පයකි. කල්පයක් අවසානයේදී ඉර වල් හතක් පායා මිහි මත ඇති සියල්ල දැවී අළු දූවිලි බවට පත්වේ.ඉන් පසුව ඇති වන වැස්සෙන් සියල්ල සේදී පවිත්‍ර වී යයි.
මෙලෙස කල්පය අවසන් වීමට හෙවත් කප නැසීමට වැටෙන වැස්ස කප නසන … කප නහන.. පද පෙරළි/ පිළි පෙරළි වීමෙන් නහ කපන හෙවත් නා කපන වැසි ඇතිවේ.
කොපමණ තද වැස්සක වුව හැදියාවක් ඇති ගැහැණියක් ” දිවීම” නොකළ යුතුය.
” සූ සැට බරණින් සැරසීලා
නා කපනා වැසි වැටෙන වෙලේ
විශාකා තොමෝ පැමිණි විලාසෙන්
මට එන්නට බෑ… නිසන්සලේ”
අහන්න”
හැන්දෑ අහසෙ පාට සාරියක් ඇඳන් ඔයා මට එන්න කීව. මම කොච්චර බලන් හිටියද ? ඇයි ඔයා ආවෙ නැත්තෙ?”
හිත මිතුරු සුළඟ ළඟ එන
වැහි වලාවට කියන්
අද නොපැමිණ අන් දිනයක වැසි රැගෙන එන ලෙසින්”
මේ අහිංසක පෙම්වතෙකුගේ අහිංසක ඉල්ලීමයි.අහන්න
වැස්සක් වලක්වන්න හැකිද ? පුළුවන් චීනුන්ට .. ගියවර චීනයේ බීජිං නුවර පැවති ඔලිම්පික් ආරම්භක උළෙල තෙත බරියන් වීමට තිබුනි. එහෙත් චීන්නු , රොකට් 26 ක් වැහිවලාකුළු තුලට විද ඒවා දියාරු කර දැමූහ. වලාකුළු වලට sulphur iodide ස්ප්‍රේ කිරීමෙන් වැස්ස කෘතිමව ඇති කළ හැකි බව ඇමරිකානුවන් දනී.
තමන්ට පාලනය කළ නොහැකි ගින්දර / වැස්ස වැනි දෑ දෙවියන් ලෙස සැලකීම මුල් කාලවලදී සිදු විය. එහෙත් මැවිය හැකි/ නැසිය හැකි න්‍යාය ධර්මයන් ( constructable/ distructable ) හඳුනා ගත් පසු තව දුරටත් ඒවා දේවත්වයේ ලා නො සැලකීමට මිනිස්සු දැනුවත් විය.
මේ එකක්වත් බැරි ලාංකිකයන් තවමත් ඉඩෝර කාල වලදී දෙවියන්ට කන්නලව් කරයි.
” වැස්ස වලාහක දෙවියනි දිවැස් හෙලනු මැන….” අහන්න