කුඩම්මා.

බ්ලොග් ලියන්න පටන් ගත්තු කාලයේ නැන්දම්මා ගැන ලිව්වා. ඒක බලපු මගේ යාළුවෙක් මට ටෙලිෆෝන් එකෙන් බැන්නා. ” උගෙ නැන්දම්ම එහෙම නෑල්ලු” අනේ වාසනාවන්. මගේ තවත් යාළුවෙක් වන සරත් මනුප්‍රියගෙ නැන්දම්මත් ඒ ජාතියේ විශේෂ නැන්දම්ම කෙනෙක්. එහෙම අතරින් පතර විශේෂ එක්කෙනෙක් දෙන්නෙක් හිටියට කුඩම්මල නම් විශේෂ අය නැතුව ඇති. අහල තියෙනවද කවුරු හරි , හොඳ කුඩම්මා ,ලස්සන කුඩම්මා ,අහිංසක කුඩම්මා වගේ වචන ?

නපුරු කුඩම්මල ඉන්නෙ ලංකාවේ විතරක් නෙවි. අපි පොඩි කාලේ හිම කුමාරි, ,සින්ඩරෙල්ලා වගේ කතා කියෙව්වේ නපුරු කුඩම්මල ගැන තරහෙන් පිපිරි පිපිරි.

ඒත් මම දන්න හොඳ කුඩම්මල දෙන්නෙක් ඉන්නව. එක්කෙනෙක් දැනට අවුරුදු 2700 කට විතර උතුරු ඉන්දියාවෙ ජීවත්වූ ප්‍රජාපතී ගෝතමී කියල කෙනෙක්. අනෙක් එක්කෙනාගෙ නම විනෝදනී.
කුඩම්මල මුලදි හොඳයි. කුඩම්මට කුඩම්මගෙම කියල ළමයෙක් ලැබුනමයි නරක් වෙන්න පටන් ගන්නෙ.

ජයපාලගේ බිරිඳ මිය ගියේ පළමු දරුවා ලැබෙන්න ගිහින්. වාසනාවට දරුව විතරක් බේරුනා. ඒත් ඒක ජයපාලගෙ අවාසනාව. අත්දැකීම් අඩු තරුණ තාත්තා කෙනෙක් කොහොමද අත දරුවෙක් බලා ගන්නෙ ?
මුලදී විනෝදකාමියෙක් වූ ජයපාල කාර්යාලෙදි බුම්ම ගෙන ඉන්නව දුටු තරුණ අවිවාහක ටයිපිස්ට් විනෝදනී
” ඇයි ජයේ ප්‍රශ්නයක්ද ?”
ඉතා ඉක්මණින් විනෝදනීගේ අනුකම්පාව ආදරයකට හැරිල ජයපාලගෙ ගෙදරටම ආවා.
” මට ඔයාගෙන් බබෙක් එපා ජයේ.. එහෙම උනොත් කවද හරි ඔයාගෙ බබාට මදි පුංචි කමක් වෙයි මගෙ අතින්. අපි මෙයා හොඳින් හදමු.”
ජයපාලට විනෝදනී ගැන හිතුනේ පුදුම ආදරයක්. එයා විනෝදනීගෙ නළල භක්තියෙන් සිප ගත්ත.
මේ විනෝදනී ඉන්නෙ සැබෑ ලෝකෙ නෙවෙයි.. මා කියවූ කුමරි පත්තරේක කතාවක.
මේ පරණ ජන කතාවක්.
ලොකු ළමයි ඉන්න තාත්ත කෙනෙක්ගෙ බිරිඳ අකාලයේ නැසී මිය පරලොව ගියා. තුන් මාසෙ දානෙ එහෙම දීල තාත්තා අමාරුවෙන් හිත හදා ගත්තත් ටික දොහකින් තාත්තට ලොකු පාළුවක් දැනුන.

කළුවර තොටේ මං බැහැලා නාන කොට
රිද්දි බිසව් ආවලු මගෙ ඉදිරියට
වරල මුදා පිට විදහා එන හැඩට
අරන් යන්න හිතුනයි ගඟුලෙන් ගමට

අතර මගදී හමුවි සිත් ගන්නා ගැහැණියක ගැන ළමයින්ගේ සිත් වලට අමාරුවෙන් ඇතුල් කරන්ටත් ළමයින් කියන නිසාම ඈ කැන්දා ගෙන බව කියන්ටත් , එයට ළමයින්ගේ කැමැත්ත ගන්නටත් මේ තාත්තා අහිංසක උත්සාහයක් කළා.

“මේ ගෙදර වැඩ පළ කරන්ටයි , උඹලට රහට කන්ට උයල දෙන්ටයි කවුරුහරි බවලතෙක් ඉන්නව නං
හොඳයි නේද පුතේ?”

” අනේ ෂෝක්.. මට කතන්දර අහ ගන්නත් පුළුවන්”.. ළමයි එක පයින්.

” මං වැඩ කරන දිහාවෙ නං කෙනෙක් ඉන්නව. එයාගෙ නම කළු මැණිකා.. අපි දොහක යමුකො ඒ අම්මව බලල එන්න”
කළුමැණිකා ළමයින්ට හොඳින් සැලකුවා.
කළු මැණිකේ කීවත්.. අප්පච්චිට වැරදීමක්.. කළුමැණිකේ සුදු පාටයි” ළමයි කිව්වා.

මේ දවස්වල පුදුම හීතලක්.. එක එක විකාර දේ ඔලුවට එනව. කුඩම්මට ඉංග්‍රීසියෙන් කියන්නෙ step mother කියලනේ. step කියනව.. කකුලට , පයට , පතුලට..

අම්ම කෙනෙකුගේ පයට පෑගෙන දූවිල්ලක් තරම් වත් වටින්නේ නැති නිසා කුඩම්මට step mother කියනව කියලයි මට හිතුනෙ.
හා හාපුරා කියල අලුත් අවුරුද්දෙ කුඩම්ම ගැන ලිව්වෙ ගුනදාස කපුගේ ගයන මොනර මාළු ගීය ඇහුවට පස්සෙ.